«Բիզոն-1» ՍՊԸ-ն ստեղծվել է 1995թ, զբաղվում է հատապտուղներից լուծվող թեյերի /չոր էքստրակտների/ արտադրությամբ՝ մասուրից, չիչխանից, հոնից, ազնվամորուց, ալոճից, մոշից: Դրանից բացի մենք կորիզներից արտադրում ենք յուղեր`չիչխանի, մասուրի, ծիրանի, դեղձի կորիզներից: Այս արտադրատեսակները օրգանական են: Թեյերի հումքը հիմնականում ձեռք է բերվում վայրի հավաքի միջոցով, որի համար ստեղծել ենք հավաքող խմբեր Գեղարքունիքի մարզում /չիչխանի պտուղների հավաք/ և Սյունիքի մարզում /մասուրի, ալոճի և հոնի պտուղների հավաք/: Վերամշակումը և վայրի հավաքը սկսած 2012թ․-ից ունեն օրգանական սերտիֆիկացում եվրոպական երկրների համար, իսկ 2016թ․-ից՝ ԱՄՆ: Որոշ օրգանական հատապտուղներ /ազնվամորի, մոշ/ ձեռք են բերվում ֆերմերներից: Լուծվող թեյերը փաթեթավորվում են մեկանգամյա ստիկ փաթեթների մեջ և իրացվում են ինչպես տեղական շուկայում, այնպես էլ արտերկրում /Ռուսաստան, ԱՄՆ/: